Audiofaylni qo‘shish
00:05:52

«Samo bilan bo‘ylashar varragim»

"Samo bilan bo‘ylashar varragim" tanlovga makola

Audiokitobning matni

Само билан бўйлашар варрагим мавзуси ҳақида ўйларканман, варракни орзуларимга қиёслагим келди, чунки мен орзуларимни санайверсам, само тугул қуёшгача етади ва улар ҳаётимни бошқарадиган асосий куч-қувват манбаи деб ҳисоблайман. 

Келажакка олдиндан режа тузиш мен учун қийин бўлса-да, лекин яқин келажакда нима билан шуғулланишим мумкинлигини чамалаб айтишим мумкин. Бу, албатта, ўзим учун қизиқарли бўлган машғулотни танлашим аниқ ва режам ҳар-хил мамлакатлар, инсонлар ҳаёти билан боғлиқ иш бўлади. Ҳозирча эса олий таълимга кириш учун астойдил ҳаракат қилмоқдаман ва келдажакда кўплаб дўст, билимлар орттираман. Мақсадимга эришгач эса инглиз тилимни яна-да мустаҳкамлайман ва компьютер курсларида ўқийман. Орзуларим қанотида учавермай-да, бу орада укам Шердор, синглим Дарёбегимга, опоқиларим ва бувиларимга, яқинларим ва дўстларимга ҳам вақтим ортади деб ўйлайман. Орзуларимни ушаладиган ва ушалмайдиганларга ажратадиган бўлсам, унда менга яшашни ҳам қизиғи йўқдек туюлади. Лекин “Қизил елканлар” фильмидаги Ассоль менда ўзгача таассурот қолдирган, унинг ҳаётидаги беаёв инсонлар уни руҳан кучли бўлишга итариб, мақсадига эришишига туртки бўлишади. Мен ҳам ўзимнинг олий мақсадим йўлида астойдил ҳаракат қилмоқдаман…
Болалигим хотиралари ёдимга тушса, кулгим қистайди, ўша пайтларда илк бора намойиш қилинган “Сарой жавоҳири” деб номланган серилдаги Тангемдек ошпаз бўлишни хоҳлардим. Кино бошланиши билан идиш-товоқларни терволиб, тарақлатиб, шовқин солиб, уйдагиларга сериал томоша қилгани бермасдим. Шундан сўнг қўшнимиз Шоирапага қизиқиб, замонавий кийимлар дизайнери, америкалик Тайра Бенкснинг “Супермодель по-американский” шоу-кўрсатувини кўриб, моделликни ҳам орзу қилганман. Вақт ўтган сари болалигимни эсласам, маҳалламдаги кўп дўстларим ва тугамайдиган қизиқарли ўйинларимизни соғинаман. Катта бўлганим сари уларнинг ўрнини жиддийлик, совуққонлик эгаллаб бораркан, лекин ҳаётда мен доим оптимист бўлишга ва позитив ўй-хаёлларга берилишга ўрганганман. Ахир Моцарт бекорга “Ҳаёт-кўзингдан ёшинг оқиб турса-да, доимо жилмайишдир”, демаган. Асосийси-кўнгил тозалиги, барчага яхшиликни соғиниш ва ҳаммани яхши кўриш! Орзу-мақсадларнинг ушалиши учун қилаётган ҳаракатларим ҳаётнинг асосий мундарижаси деб ўйлайман.
Ҳаётда кимдир кўп бойликни, кимдир унвонни қувса, кимдир чиройни, бошқаси ақлни, яна бири эса кучни ортидан қувади.Лекин мен учун келажакда юқори мансабнинг маоши эмас, мени тушунадиган ва асрайдиган ҳақиқий инсон билан турмуш қуриш ва ҳамма ҳавас қиладиган оила бўлиб яшаш асосий мақсадларимдан биридир.Оилада ибратли келин, меҳрибон опа ва сингил, яхши она ва фаросатли турмуш ўртоғи бўлишга ҳаракат қилганимдан ташқари, юртимнинг келажаги, миллатимнинг обрўси, хуллас, бутун инсоният ҳақида чуқур ўйга толаман. Ватанимнинг ривожланиши ва равнақи йўлида астойдил ҳаракат қилишим кераклигини масъулият билан юракдан ҳис қиламан.
Ҳозирча коллежим ҳаётида фаол иштирок этиб келмоқдаман, ҳар бир Ватаним учун муҳим бўлган саналарнинг тадбирларида, ободонлаштириш ва кўкаламзорлаштириш ишларида ва оммавий ахборот воситалари орқали эълон қилинаётган танловлар, грантларда қатнашиб боришга астойдил ҳаракат қилмоқдаман. Биз ёшлар учун зўр шароит яратган “Камолот” ёшлар ҳаракати тўгаракларига ҳам аъзо бўлиб, байрамларни ташкиллаш ва олиб бориш, лидерлик қобилиятимни тенгдошларим билан биргаликда анча ўстирдим. Вилоят ахборот-ресурс марказида ҳар куни ташкилланган инглиз тилида суҳбатлар, дискуссиялар, трейнинглар ва савол-жавоб тарзидаги қизиқарли ўйинлар менга бошқа тилни ўзлаштиришимга жуда катта ёрдам бўлди.Ўқув марказлари ўртасидаги рақобат мени хоҳлаган ўқитувчини танлаб таълим олиш имкониятимни кучайтирди. Маънавияти кучли инсонларгина жангда ғолиб бўлиб, ўз мақсадига эришишларини яхши биламан, шу йўлда мен ҳам жамиятимизда рўй бераётган янгиликларга лаббай деб жавоб бериб, юртимда, шаҳримда, маҳалламда ва коллежимда ўз ўрнимга ва ўз овозимга эга фуқаро бўламан. А.Навоий “Хазойин ул-маоний” асарида инсоннинг умрини 4 фаслга ўхшатади ва йигитлик даврини, яъни 25 ёшдан 35 ёшгача бўлган вақтни умр баҳорига қиёслайди, шундай экан, мен ҳам умримнинг кузи, қиши келмай туриб, ундан оқилона фойдаланиб, кексалик давримда набираларимга ўрнак бўладиган буви бўламан.
Мен Зиёнет тармоғида яратилган кутубхона китобларидан ва бошқа имкониятларидан доимий равишда фойдаланиб бораман, танловда Фикр.уз сайтига ижод намунамиздан топширишимиз мумкинлигини билиб, жуда хурсанд бўлдим ва ёзган мақоламни назардан четда қолдирмайсизлар деган умиддаман.
Ўзбекона урф-одат, анъана ва қадриятларни сингдириш ва асраб авайлаш фазилатларини шакллантириш мақсадида ташкилланган танловга Навруз байрамида юртимда ўтказиладиган тантаналар ҳақида ўз билганларимни ёздим.
Наврузда варрак учириш миллий анъанаси Навруз байрами юртим мустақил бўлгач, биргаликда кириб келди. Варракларнинг шамолда ҳилпираб, қуёшнинг илиқ нурлари остида учиши юракларга қувонч бағишлайди. Варрак учириш мусобақаси ўсмирлар ўртасида бўлиб, энг баланд ва ўз қўли билан ясалган варраклар муносиб баҳоланади. Юртим осмонида варраклар бемалол учиши учун ҳар бир инсоннинг бир бўлаги бўлган Ватанини жони дилидан ардоқлаши, ўзини юрт олдидаги масъулиятини ҳис қилиши лозим. Бунинг учун ўз юртининг тарихи, анъаналари ва қадриятларини яхши билиши, табиати, далалари, тоғу-адирлари, дарё-ю кўллари, шу заминда яшаб ўтган аждодлари, тили, динини онасидек яхши кўриши керак.
Мустабид тузум ҳар томонлама миллатимни камситишга ҳаракат қилиб, қолоқ, саводсиз, ўз тарихига эга эмас халққа чиқарди, Наврузни нишонлаш тугул, Қурбон хайити байрамларини ҳам эсдан чиқарай дедик. Мустақиллик шабадалари ўзи билан бирга дошқозонда сумалакни, мунис онахонларимиз, опа-сингилларимизнинг аллаларини, атлас ва адрас каби миллий матоларимиздан кўйлак кийган қизалоқларнинг қувончи-ю, сочини қирқ кокил қилиб ўрган сингилларимизнинг хаёли табассумни юртимга қайтариб бергандек гуё.
Юнеско жамияти ва БМТ Ассамблеяси 30-сентябрь 2009-йил Навруз байрамини инсониятнинг маданий бўлган обидалари қаторига киритди ва Халқаро байрам деб эълон қилди. Ўзбегимнинг ҳар бир вилоятида, вилоятларнинг ҳар бир шаҳар ва қишлоқларида байрам шодиёналари ўзгача шукуҳда нишонланади.
Мамлакатимизда Навруз байрамини нишонлашдан олдин кўчалар, хиёбонлар ховлилар ва уйлар обдон тозаланади. Кўчаларга гуллар ва кўчатлар экилади. Яқинларидан, танишлардан ва қўни-қўшнилардан аразлаб юрганлар яраштирилади. Қарздорлар зудлик билан қарзини қайтарадилар, чунки қуёш календари бўйича бошланган янги йилга, қарз билан кирилса, йили бўйи боши қарздан чиқмайди, деган ирим бор халқимизда ва бу каби урф-одатларимиз инсониятни фақат яхшиликка бошлайди деб ўйлайман.
“Навруз байрамингиз қутлуғ бўлсин, ҳосилингиз баракали бўлсин, йилимиз қут-барака ато этсин, айёмингиз муборак бўлсин” деб юрдошларимиз бир-бирларига тилак билдиришади
Табиатнинг янгиланиши, мўл ҳосилга катта умид бағишловчи бу байрам юртга баҳор келганлигидан даракдир. Байрамимизнинг қадимийлиги унинг узоқ ўтмишимизга бориб қадалиши, яъни инсониятнинг ерга дон қадаб, буғдой каби ризқимизни экиб, ўзи ҳам маданийлашиб борган пайтга тўғри келганлиги учун ҳам биз учун азиз бўлса, неажаб!
Кун ва туннинг тенг келиши, Наврузнинг анъанавий, сир-асрорга тўла, тилни ёрувчи, шакар солинмаса-да болдай ширин, табиатнинг мўъжизаси-СУМАЛАКдир! Ўстирилган буғдой майсаси ва ундан тайёрланган бу таом узоқ умр тимсоли, табиатнинг гултожидир. Аста-секинлик билан қайнаётган сумалакни кавлаётган барча юртдошларимиз ўз эзгу тилакларини билдириб, таг олмаслиги учун тош ва ёнғоқ ташлашади, келаётган йил мўл ризқ-рўз беришини Яратгандан сўрашади. Тайёр бўлган таомни барча яқинларига тарқатадилар. Каттакон ўчоқ атрофида бутун маҳалланинг канвойи онахонлари-ю, ёш қиз-жувонлар тўпланиб, кўклам қўшиқларидан куйлаб, баҳор куртакларини кўнгилларда очилтиришади. Болажонларимиз эса “Бойчечак”, “Гунафша”, “Ёмғир ёғалоқ”, “Оқ теракми, кўк терак”, “Чучвара қайнайди-ё”, “Читти гул”, “Оппоғой” каби қўшиқлар куйлашади. Ер бағрини ёриб чиққан бойчечакни ота-боболаримиз кўзларига суриб:”Омонлик, сомонлик, ҳеч кўрмайлик ёмонлик, худойим шу ёруғ кунларга етказганига шукр”, деб шукрона ва таҳсинлар айтишган.
Бойчечагим бойланди,
Қозон тўла айронди.
Айронингдан бермасанг,
Қозонларинг вайронди.
Қаттиқ ердан қазилиб чиққан бойчечак,
Юмшоқ ердан югуриб чиққан бойчечак, деб бошларига толпопуклар таққан ёш-яланглар ўз яқинларига бойчечак улашишган, ҳозирги кунда бойчечакни кам кўрсам-да, Тошкентга кетаётиб йўлларда қучоқ-қучоқ лолаларни олиб чиққан болажонларни кўриб бахри- дилинг очилади одамнинг!
А.Ориповнинг “Саломнома”шеъри ёдимга тушди:
Баҳор чоғи чулдираган ирмоқлардан,
Сўқмоқлардан ва зангори ўтлоқлардан,
Адирларда кечган шодон, хуш чоғлардан,
Салом бўлсин яшил кўклам наққошига!
Навруз кунлари барча кўча ва хиёбонларга, боғ ва сайилгоҳларга чиқишган. А йтишувлар, лапарлар, термалар, аскиялар пайрови, мутойибалар айтишган. Йигитларимиз улоқ-кўпкари, курашлар ташкиллашган, Полвонлар тош ўйинлари, арқон тортиш мусобақалари, дорбозлар дор тикиб, барчани лол қолдирган, масхарабозлар гап ўйинлари билан элни кулдириб, ўз санъатларини намойиш этганлар.
Юртимнинг барча вилоятларида байрамни ўзгача шукуҳ билан кутиб олишади, ҳар бир миллатнинг ранг-баранг ашула ва рақслари, қўшиқлари ва лапарлари намойиш қилинади.Уларнинг бадиий чиқишлари қалбларни фахрга тўлдиради.
Дастурхонда гўшт ва буғдойдан тайёрланган ҳалим, кўкатли сомса, манти, ўрама, бичак, ялпизли чучвара, майиз, ўрик каби табиат неъматлари кўзни қувонтиради. Маҳалламизда ўтказиладиган ҳар йилги Навруз байрамида кам таъминланган оилалар фарзандларига “Бешик тўйи”, “Суннат тўйи” каби маросимларни биргаликда ўтказамиз. Бу юртимиздаги инсонларни бир-бирига меҳр-оқибатли, саховат ва мурувватли, ногирон ва муҳтожларга эътиборли бўлишга ундайди.
Ҳар куни шаҳар ва қишлоқларимизда қурилган ва қурилаётган корхоналар, лицей ва коллежлар, тиббиёт ва спорт муассасалари, бозорлар ва савдо дўконлари, кўп қаватли биноларнинг очилиш маросими бўлиб, фойдаланишга топширилаётганига гувоҳ бўлмоқдамиз, Бу каби очилишлардан кўпи Навруз байрамида бўлиб ўтади.

Хуллас, Ўзбекистонимнинг Наврузи, кўклами яна кўп асрларга хизмат қилсин!

Xato to‘g‘risida ma‘lum qilish Translit